De Letterfretter
De letterfretter, de letterfretter
fynt alle lûden like lekker.
Hy stelt se troch in hek of stek
of ljept derfoar oer it wetter.
Hy fret se troch hiel Fryslân op;
syn búk wurdt hieltyd fetter.
Alle lûden
In sinnebaaiende pappegaai, in gouddo en in sliepperich rûpke, de letterfretter komt alderhande bisten tsjin op syn reis troch Fryslân. Hy is op syk nei Fryske lûden (klinkers) sa as de Â, de OA, de II en al dy oaren, dêr is er sljocht op. Folgje de letterfretter op syn reis en lear boartsjendewei alle Fryske lûden en de aldermoaiste Fryske wurden.
Yn it boek De letterfretter steane 47 gedichten fol taalrykdom, mar ek mei humor, dat is Lida Dykstra wol tabetroud. Berber van den Brink makke de prachtige yllustraasjes. Dat alle lûden dy’t yn it Frysk foarkomme yn dit boek systematysk op in rychje steane, makket fan De letterfretter in nije klassiker dy’t yn gjin inkele boekekast ûntbrekke mei. It is in boek foar minsken fan 10 – 100 jier.
Produkten
De Letterfretter is sljocht op Fryske lûden (klinkers) sa as de â, de oa, de ii en al dy oaren. Helpsto him om de wurden mei itselde lûd byelkoar te sykjen? Hast se alle fjouwer? Dan hast in kwartet én tagelyk de komplete yllustraasje út it boek De Letterfretter fan Lida Dykstra, dêr ‘st alle lûden yn it Frysk yn fine kinst.De yllustraasjes binne fan Berber van den Brink en de foarmjouwing is dien troch Jelmer van der Meulen.
Letterfretter yn de media
Letterfretter kleurplaat
Skriuwster en yllustrator
Lida Dykstra skriuwt berneboeken yn it Nederlânsk en it Frysk en hat in lange list fan prizen en nominaasjes yn de wacht sleept: yn 2022 wie sy nominearre foar de Woutertje Pieterseprijs en de Boon (Flaamske literatuerpriis) foar De schaduw van Toet en yn 2007 wûn se de Simke Kloostermanpriis foar Lederwyntsje, bern mei krêften. Fan 2022-2023 wie Lida berneboek-ambassadeur yn Fryslân en hat yn dy funksje tal fan skoallen besocht en bern entûsjast makke om Frysk te lêzen, se wie ek aktyf as Schoolschrijver. Sy wit dan ek as gjin oar wat bern oansprekt en wêr’t se tsjin oanrinne by it lêzen.
Berber van den Brink (1982) wurket as yllustrator en grafysk ûntwerper. Nei har opliedingen Docent Beeldende Kunst & Vormgeving en Communicatie & Multimedia Design is sy fyftjin jier lyn mei har eigen studio begûn. Har wurk is kleurryk en konseptueel, grafysk en/of teatraal, mei humor.
